ओखलढुंगा: काेराेना संक्रमणबाट ज्यान गुमाउने १४ पुगे, विहीबार थपिए ३७ संक्रमित

स्केच !

२०७८ श्रावण २८, बिहिबार मा प्रकाशित ३ साल अघि

ओखलढुंगा- ओखलढुंगामा काेराेना संक्रमणबाट ज्यान गुमाउनेकाे संख्या १४ पुगेकाे छ । बुधबार मोलुङ गाउँपालिका वडा नं ६ श्रीचौरकी ४४ वर्षीया एक महिलाको कोरोनाबाट मृत्यु भएसँगै जिल्लामा कोरोनाबाट मृत्यु हुनेको संख्या १४ पुगेको हाे ।

साउन २५ गतेबाट कोरोना संक्रमण भएर ओखलढुंगा सामुदायिक अस्पतालमा भर्ना भएकी ती महिलाको बुधबार विहान ९ बजे मृत्यु भएको स्वास्थ्य कार्यालय रुम्जाटारका सूचना अधिकारी पुष्पराज पन्तले जानकारी दिए ।

यसैगिर बिहीबार ३७ जना नयाँ संक्रमित थपिएका छन् । विभिन्न स्थानिय तहमा गरिएको १ सय ३७ जनाको एन्टिजेन परिक्षणमा थप ३७ जनामा कोरोना संक्रमण पुष्टि भएको हो ।

संक्रमण पुष्टि हुनेमा सिद्धिचरण नगरपालिकाका ९ जना , सुनकोशी गाउँपालिकाका २१ जना र चिशंखुगढी गाउँपालिकाका ६ जना रहेकोे जिल्ला स्वास्थ्य कार्यलय ओखलढुंगाले जनाएको छ ।

ती स्थानीय तहका ६९ पुरुष र ६८ जना महिलामा गरिएको एन्टिजेन परिक्षणका क्रममा ३७ जना कोरोना पोजेटिभ देखिएको छ ।  उनीहरु सबै होम आईसोलेसनमा रहेका छन् ।

यसैबिच आज ओखलढुंगाबाट ८ जना कोरोना संक्रमित उपचारपछि निको भएका छन् । यसअघि बिभिन्न समयमा कोरोना संक्रमण पोजेटिभ भई होम आईसोलेसन तथा संस्थागत आईसोलेसनमा रहेका मोलुङ गाउँपालिकाका ८ जना कोरोना संक्रमित निको भएका हुन् ।

जिल्लामा कोरोना संक्रमितको कुल संख्या १ हजार ९ सय ८९ पुगेको छ । जसमध्ये १ हजार ७३ जना पुरुषको संख्या रहेको छ भने ९ सय १६ जना महिला रहेका छन् । संक्रमितमध्ये हालसम्म १ हजार ७ सय १९ जना उपचारपनि निको भएका छन् । हाल जिल्लामा संक्रिय संक्रमितको संख्या बढेर २ सय १९ पुगेको छ । जसमा ११ जना संस्थागत आईसोलेसनमा र २ सय ८ जना होम आईसोलेसनमा रहेका छन् ।