लिखु गाउँपालिकाका अध्यक्ष र वडा अध्यक्षका घर जले, ५० लाख बराबरको क्षति

नागरिक मिडिया

२०७८ बैशाख ३, शुक्रबार मा प्रकाशित ३ साल अघि

ओखलढुङ्गा- लिखु गाउँपालिकाका अध्यक्ष गोविन्द बहादुर पौडेलको घर आगलागीबाट जलेको छ । उनको सँगै रहेको वडा नं. ८ का वडा अध्यक्ष विशाल पौडेलको घर समेत जलेको छ ।

गाउँपालिका अध्यक्ष र वडा अध्यक्षका तीन वटा घर जलेका छन् । दाजुभाइका सगोलमा रहेका तीन घर हिजो राति परेको चट्याङ्ग लागेर आगलागी भएका थिए । आगो लागेर घरमा भएका सबै धनमाल नष्ट भएका छन् ।

घरमा कोही नभएकाले मानवीय क्षति हुनबाट जोगिएको प्रहरीले जनाएको छ । आगो लागेर ३ लाख नगदसहित ५० लाख बराबरको क्षति भएको जिल्ला प्रहरी कार्यालयका ओखलढुंगाका प्रहरी निरिक्षक शिव कट्टेलले जानकारी दिनुभयो ।

तीन घर तथा धनमाल सबै जलेपछि पौडेल परिवारको बिचल्ली भएको छ । गाउँपालिका अध्यक्ष गोविन्द पौडेल दाजु र वडा अध्यक्ष विशाल पौडेल वडा नं. ८ का वडा अध्यक्ष हुन् ।

चट्याङबाट पौडेल परिवारलाई ठूलो क्षति पुगेको स्थानीय नविन पौडेलले बताउनुभयो ।
त्यस्तै बिहीबार मानेभञ्ज्याङ गाउँपालिका २ वाक्सामा भएको आगालीमा २ घर जलेका छन् । स्थानीय भक्त राईको गोठबाट सल्किएको आगोले उनको एक घर र एक मतान तथा छिमेकी कृष्ण बहादुर राईको घर जलेको थियो ।