‘वर्थ डे’ पार्टीमा बाेलाएर साथीलाई ‘बलात्कार’

नागरिक मिडिया

२०७७ श्रावण ४, आईतबार मा प्रकाशित ४ साल अघि

ओखलढुंगा– जन्मदिनको अवसरमा भोज खुवाउने बाहानामा साथीलाई बलात्कार गरेको आरोपमा प्रहरीले एक युवकलाई पक्राउ गरेको छ । शुक्रबार राती मानेभज्याङ गाउँपालिकाका २६ वर्षीय युवकले जन्मदिनको पार्टी दिने भन्दै बोलाएर २३ वर्षीया केटी साथीमाथि जबरजस्ती करणी गरेको पीडिताको आरोप छ ।

उनीहरु सानै उमेरदेखि साथी भएको र शुक्रबार युवकको जन्मिदिन परेकाले युवतीलाई पार्टी दिने भन्दै राती घरैमा लिन गएर जबरजस्ती करणी गरेको केटी पक्षले दिएको उजुरीमा उल्लेख छ ।

युवकले मादक पदार्थ सेवन गरेर आफुमाथि जबरजस्ती करणी गरेको पीडित युवतीले बताइन् । पीडितको जाहेरीका आधारमा शनिबार ती युवकलाई पक्राउ गरी म्याद थप गरेर अनुसन्धान सुरु गरीएको ओखलढुंगा प्रहरी निरिक्षक मिलन बस्नेतले जानकारी दिए ।

यस्तै यसअघि शनिबार नै सोही गाउँपालिकाकी २७ वर्षीया विवाहित महिलामाथि जबरजस्ती करणी गरको आरोपमा २३ वर्षीय युवक पक्राउ परेका छन् । श्रीमान बैदेशिक रोजगारीमा गएको मौका छोपी जबरजस्ती करणी गरेको र ५ महिनाको गर्भ समेत रहेको भन्दै महिलाले जाहेरी दिएपछि उनलाई पक्राउ गरिएको प्रहरी निरीक्षक बस्नेतले बताए ।

ती महिलाले आफुमाथि जबरजस्ती करणी गरेको भन्दै शनिबार नै प्रहरीमा जाहेरी दिएकी थिइन् ।