बाढीकाे वितण्डा: देशभर २४ जनाको ज्यान गयो, ३७ जना बेपत्ता

देशभर विभिन्न स्थानमा बाढी पहिराेले पुर्याएकाे क्षति । तस्वीर: उज्यालाे अनलाइन

नागरिक मिडिया

२०७७ अषाढ २६, शुक्रबार मा प्रकाशित ४ साल अघि

काठमाण्डौ– लगातारको वर्षापछि आएकाे बाढी पहिराेमा परि देशभर २४ जनाको ज्यान गएको र ३७ जना हराइरहेका छन् ।

पहिरोमा परि कास्कीका विभिन्न ठाउँमा गरी सात जनाको ज्यान गएको र आठ जना घाइते भएकाे प्रहरीले जनाएको छ । जिल्ला विपद् व्यवस्थापन समिति कास्कीले ज्यान गुमाउनेको परिवारलाई एक लाख रुपैयाँ राहत र घाइतेहरुको निःशुल्क उपचार गर्ने निर्णय गरेको छ ।

यस्तै म्याग्दीको विभिन्न ठाउँमा गरी तीन जनाको ज्यान गएको छ भने ३१ जना हराइरहेका प्रहरीले जनाएको छ ।

जाजरकोटको बारेकोट गाउँपालिका ४ मा पहिरोले घर बगाउँदा सात जनाको ज्यान गएको छ भने पाँच जना हराइरहेका छन् । बारेकोटकै धुमा खोलाले बगाउँदा एक जनाको ज्यान गएको छ, एक जना हराइरहेका छन् ।

यस्तै लमजुङमा तीन जना, रुकुम पश्चिममा दुई जना र गुल्मीमा एक जनाको ज्यान गएको प्रहरीले जनाएको छ । विपद् भएका ठाउँमा उद्धार तथा खोजीको काम भइरहेको सरकारले जनाएको छ ।

सिन्धुपाल्चोकमा बिहीबार बाढी र पहिरोमा परी हराइरहेका २१ जनाको शुक्रबार पनि खोजी भइरहेको छ ।

यसैबीच अहिले पनि देशका सबैजसो ठाउँमा मौसम बदली हुनुको साथै धेरै ठाउँमा हलुकादेखि सामान्य वर्षा भइरहेको मौसम पूर्वानुमान महाशाखाले जनाएको छ ।