धिताेमा छ

नागरिक मिडिया

२०७७ अषाढ ११, बिहिबार मा प्रकाशित ३ साल अघि

कविता: अम्विका न्याैपाने 

मेरो जीवन भरको कमाइ,

सातधुर घडेरी धितोमा छ,

घडेरी धितो राखेर,

खोलेको खाजा पसल धितोमा छ ,

यही खाजा पसलको आर्जनले,

छोरा र छोरी पढाउने ,

मेरा सबै सपना धितोमा छ,

मेरो आमा र बुवाको,

बुढेसकालको सहारा बन्ने,

मेरा सबै चाहना धितोमा छ ,

मेरी पियारीलाई एउटा सारी ,

उपहार दिने मेरा सबै,

रहरहरू धितोमा छ ,

खाजा पसल खोलेको पन्ध्रदिन नबित्दै ,

सुरू भएको लकडाउन र कोरोनाको कहरले ,

मेरा सबै सपना र चाहनाहरू धितोमा छ ,

यो लकडाउनको अवधिमा निर्जिव बनेका ,

मेरा सपनाहरू ,

त्यसै त्यसै टोलाउन लागेको छ,

बाटामा हिँडेका केही फाट्ट फुट्ट,

मानिसहरूमा मेरा सपनाहरू

खोज्न थालेको छु,

मनमनै भन्छु हेरन यता म धितोमा छु ,

एक कप चिया पिइदेऊन म धितोमा छु ,

बैंकको ऋण तिर्नु छ ,

गाँसबास धान्नु छ ,

मेरो जीवनभरको कमाइ,

मेरो घडेरी धितोमा छ ,

हेर्दैनन् फर्केर कसैले,

पिउँदैनन् एक कप चिया,

मेरा सबै सपना मझेरी परेको छ,

ब्याज तिर्न प्रियाको मुन्द्री,

कानबाट झरेको छ ,

म हेर्दै छु ,

मन्दिरको धर्मशाला ,

किनकी बसाइँ सर्नु पर्ने छ ,

मेरो जीवनभरको कमाइ,

सातधुर घडेरी धितोमा छ ।

-सेताेपाटीबाट